आई राजल स्तुति – छंद

दुहो

नवरोजा मथ्थे नख्ख,दख्ख ऐसो दरसाय.
राजल रजपुत रख्ख,नवरोजो दीयो छुडाय.

छंद-नराच

पीथल लज्ज कज्ज सज्ज सिंह रुप धारणी.
सुणी पुकार गौ दुता ता दिल्ही पधारणी.
चराडवे चडी वडी संभाळ बाळ तारणी.
दहाड राजला अव्वल चाळ सुण चारणी. (१)

बिकाण भुप हाण जाण तुं पलाण सिंहणी.
बिराण हाक डाक भैर क्रुध्ध कालीका बणी.
अनील वेग ले चली कतीब नीब डारणी.
दहाड राजला अव्वल चाळ सुण चारणी. (२)

विपल पल मे सबल तुं उथल भु सता.
मगा अगा जा ले भवा डगा मगा मिया पुता.
कराल कोप शंकरी हरी स्वरुप ले बणी.
दहाड राजला अव्वल चाळ सुण चारणी. (३)

अली मदद रद तद पीर हद पे भया.
नमाज वाजरा अवाज आज मुख से गया.
डँणक डाढीयाळ मात जा तळाप मारणी.
दहाड राजला अव्वल चाळ सुण चारणी. (४)

अडेड वाट आभ फाट तुं जपाट ले चडी.
हथालरी थपाट लाट भोम पाटरी फटी.
अथोक कोप भेंकरी लटाक लाक मारणी.
दहाड राजला अव्वल चाळ सुण चारणी. (५)

नोरोज बोज खंडणी प्रचंड चंड दंडणी.
छतीस साख खतीया तुं ओट लोवडी भणी.
रुआब दाब पातशाह तुं गरुर गारणी.
दहाड राजला अव्वल चाळ सुण चारणी. (६)

मगे रगे जलालुदीन खीन खीन मुगला.
अबे शरण थाहरे सहार तार हिंगुला.
सदा सेवगा सहाय भीड भंज कारणी.
दहाड राजला अव्वल चाळ सुण चारणी. (७)

छप्पन कोड चामुंडा चोरास चारणा भळी.
नवे ही लाख लोवडी विशाभजा भजा वडी.
नराच छंद मे “विजो” भणो खमा धणी घणी.
दहाड राजला अव्वल चाळ सुण चारणी. (८)

कवित

अकबरा काल माइ,छतीस शाखा पे आइ.
खतीया पे मोगलाइ,हुकम चलाइ है.

मीट न मंडाइ जाइ,उथपे न बात पाइ.
नको मुंछे ताव लाइ,कुरनीश बजाइ है.

जीण ने जुकायो नाइ,शीश कट जावे ताइ.
कातो दे लडाइ लाइ,राज रजडाइ है.

उण दीण मे भराइ,नवरोज ले के आइ.
“विज” वे राजल साइ,पीथल बचाइ है.

– चारण विजयभा हरदासभा बाटी बावळी